Bunaíodh Teilifís na Gaeilge mar eintiteas neamhspleách reachtúil ar 1 Aibreán 2007. Is faoi scáth RTÉ a bunaíodh an cainéal ar dtús agus a d'fheidhmigh sé 1996-2007. Tá dualgais agus feidhm TG4 (Teilifís na Gaeilge) leagtha síos i Roinn VI den Acht Craolacháin 2001. Naonúr comhaltaí atá ar bhord Theilifís na Gaeilge. Is é Peadar Ó Cuinn, iarUachtarán CLG, atá ina Chathaoirleach. Is iad seo a leanas comhaltaí TG4:

• Peadar Ó Cuinn (Cathaoirleach)
  Fear gnó agus comhairleoir bainistíochta as Fear Manach. Stiúrthóir ar an Quinn Group. Iar Uachtarán Chumann Lúthchleas Gael. Iarbhall de Choimisiún Paráideanna Thuaisceart Éireann.
• Pól Ó Gallchóir (Ardstiúrthóir)
  Chuaigh sé i mbun oibre le RTÉ mar Iriseoir i mBaile Átha Cliath i 1980. Ceapadh é ina Cheannaire ar Raidió na Gaeltachta i 1994 agus tá sé i gceannas TG4 ó Mhí Aibreán 2000. Is as Gaoth Dobhair ó dhúchas é agus tá sé ina chónaí i nGaillimh ó 1994.
• Regina Uí Chollatáin
  As Leitir Ceanainn ó dhúchas. Léachtóir Nua Ghaeilge sa Choláiste Ollscoile, Baile Átha Cliath. Tráchtaire rialta sna meáin Ghaeilge.
• Joe Connolly
  Fear gnó as Gaillimh. Réalt iomána lena chontae dúchais agus captaen ar fhoireann 1980 a bhuaigh Craobh na hÉireann. Cathaoirleach ar Mheitheal Oibre CLG ar Mhíúsáid Drugaí agus Alcóil.
• Pádraig Mac Donncha
  As Gaeltacht Ráth Cairn i gCo na Mí. Oibrí pobail agus gníomhaire teanga. Bunaitheoir agus bainisteoir Chomharchumann Ráth Cairn. Iar Chathaoirleach ar Chomhairle Raidió na Gaeltachta.
• Bríd Ní Neachtain
  Aisteoir. As Ros Muc i nGaeltacht na Gaillimhe ach ina cónaí i mBaile Átha Cliath le fada. Is iomaí dráma agus scannán déanta aici, ina measc Cré na Cille agus Dancing at Lughnasa.
• Eilís Ní Chonnaola
  Múinteoir as Cois Fharraige i nGaeltacht na Gaillimhe atá anois ag teagasc i nDúiche Sheoigheach. Gníomhaí Pobail.
• Feargal Ó Sé
  Múinteoir Náisiúnta atá ag teagasc ina cheantar dúchais i nGaeltacht Chorca Dhuibhne. Imreoir agus traenálaí aitheanta peile. Ball de theaghlach cáiliúil Ard a' Bhóthair.
• Méabh Mhic Ghairbheith
  Múinteoir atá lonnaithe i dTeilinn i nGaeltacht Dheisceart Dhún na nGall. Speisialtóir san aosoideachas. Gníomhaí in obair fhorbartha phobail.
• Méadhbh Nic an Airchinnigh
  Corcaíoch atá i mbun Ph.D i Scoil na Gaeilge, Ollscoil na Éireann, Gaillimh. Chaith sí tréimhse ag múineadh Gaeilge sna Stáit Aontaithe Mheiriceá ar Scoláireacht Fulrbright. Spéis sa cheol agus sa spórt.
• Rónán Ó Coisdealbha
  Eagraí Spóirt TG4. Tofa mar ionadaí ar an mBord ag foireann de réir fhorálacha an Acht Craolacháin 2009 agus ceaptha ag an Aire.